الثلاثاء، نوفمبر 13، 2007

لـ... قمر مقسوم


ولا هنتي ..
ولا كنتي ف يوم إنتي
البراح ..والضيق
ولا بتديق حكاوينا في حضن صديق
ولو مش حاسه غير همّك ؟
ولا يهمّك
هـ (تتعاشي)
أنا همي مهوش مقسوم
على الماشي
هـ(تتعاشي)
وهتنفس غناكي كتير
واطيييير قبلك
لسكه تكون دوا جراحك
وضحكه تلم أفراحك
وتفتح لك بيبان بكره
وليه..فاكره النصيب غلاب ؟
وليه دايما غناكي عتاب ؟
وليه دمعك بقى قصرك
بلا
أبواب؟
عشان كل اللي كان والجي
عشان القلب يفضل حي
مانموتشي
ولا نخلي النهارده يروح
مانحلمشي
واذا عز الفرح نادي
بصوت..نادي
على الذكرى اللي كانت بيت لأحلامك
وإيد ...بتقيد
لأيامك
وبتطبطب
ولا... نغضب
ولا... نعتب
ولا هنلوم
ونتحايل
على المقسوم