لـ... قمر مقسوم

ولا هنتي ..

ولا كنتي ف يوم إنتي

البراح ..والضيق

ولا بتديق حكاوينا في حضن صديق

ولو مش حاسه غير همّك ؟

ولا يهمّك

هـ (تتعاشي)

أنا همي مهوش مقسوم

على الماشي

هـ(تتعاشي)

وهتنفس غناكي كتير

واطيييير قبلك

لسكه تكون دوا جراحك

وضحكه تلم أفراحك

وتفتح لك بيبان بكره

وليه..فاكره النصيب غلاب ؟

وليه دايما غناكي عتاب ؟

وليه دمعك بقى قصرك

بلا

أبواب؟

عشان كل اللي كان والجي

عشان القلب يفضل حي

مانموتشي

ولا نخلي النهارده يروح

مانحلمشي

واذا عز الفرح نادي

بصوت..نادي

على الذكرى اللي كانت بيت لأحلامك

وإيد ...بتقيد

لأيامك

وبتطبطب

ولا... نغضب

ولا... نعتب

ولا هنلوم

ونتحايل

على المقسوم

فستان البنفسج

تسمحيلي ...؟
ياأميرة الحزن

أفرح
لو ف قلبك لسّه مطرح
طفي أنوار المكان
طفي اسرارك كمان
طفي حزنك
تسمحيلي ؟
أرقص الرقصه الأخيره...جوّا حضنك ؟
حلو فستان البنفسج
جوّا....نفسك
حلوه..نفسك
هدهديني..لملميني
وازرعيني فوق جبالك
لو خيالك..كان جَسور
خلّي انفاسك تمطر
فوق جسد منهك ..عطور
ياأميرة الحزن قلبي لسّا ..صاحي
حطي إيدك فوق جراحي
وارقصي
واتنفسّي حزني العجوز
واطلقيني بحرقه آهه
من صداها مش يجوز

نلقى رد الأسئله ؟

ست البنات

كانت

تعدي في الشوارع والحارات

تزرع....فَرَح

وتسيب وراها -لما تمشي-في القلوب
لهفه وأهات

كانت "شهيّه"

عيونها كانوا..شبّاكين

طالّين... عليّا

والصبيّه ف كل رايحه وكل جايه

تقول أنا : ست البنات

بتقوم ..يقوم الفجر

تضحك

يتولد من ضحكها نورالنهار

ينشر..عمار

كانت تبات

ويبات ف قلبي حلمها

وف قلبها
ياااااقلبها

سكّر..نبات

كانت صغيره والضفيره

تملا كل الكون صهيل

كانت : هديل

بتميل

تميّل بختِنا

وتهزّ نخلة حلمنا

يسقط.....غمام

وتنام..

تصحّي في العروق
أسراب.. حمام
كان حلمها فارس أصيل

أسمر ..جميل

مصري..جدع

لما توشوش في الودع

تلقاه دليل

كانت هديل
والنيل صحاب

طلّ الغياب

عرّاف بيقرا فوق خريطة جسمها

مليون..عتاب

راحوا الصحاب
واتفرّقوا........

وفْضِلْت وحدي بانتظر

خمسين سنه

ولا عادش للشارع

هديل

ولاعاد

نخيل

ولاعادش فاضل في الحكايه

غير خلا

قلبي اللي عمره مااتملا

قلبي الجريح

وف كل ليله بينفرط

عصفور

وريح

عتاب

قوليلي منين أبدأ عتابي
والكلام مفروط
بقالي سنين
وانا واقف على ابوابك
وبالقى سكوت
ولا ابوابك بتعرفني
لا حرّاسك ولا... ناسك
وبندهلك..ويبكي الصوت
أنا جايلك..وشايلـ ـلك
على كفي ..نهار تاني
وحلم ..جديد
وحبة شعر ..لعيونك
و للمواعيد
ومحتاجلك
نهار..ليّا

وليليّه
و إنســيّه

وجنيّه

وست الحسن

فرس...جامح

الفنان التشكيلي حسام عتلم

خلص الكلام
مافاضلش غير الإعتذار
للأنبياء ..والأوليا ء
ولكل خدّام المقام
فصل الكلام:
إختار مصيرك

ياتعيش كما غيرك ماعاش
ياتموت...

ملك

فرس جامح
ورامح
في الزمان مشاوير
ودرت كتير ورا نفسك
ورا غيرك

واهُه !

وحدك وضلّك
إنت اهُه
بعد النهار
واقف على حدود الليالي بتنطفي
حزنك عفي

حزنك عفي
لخبط حدودك
وانت واقف زي عيّل مندهش
مافاضلش شئ جوّاك اهُه
على مطرحه
خربش وجودك

إجرحه
واختار مصيرك

وتر الربابه

مشدود قوي
وتر الربابه ومستعد
انت المغني العازف / الملهوف
تمدّ
مستني إيه؟؟
والليل ...طويل
بيشق سدري

ويكشف القلب العليل
ممدود وريدي من سكاتي
لحد آخر صرختك
إعزف

وردد في المسافات اللي بينا غنوتك
همسك
سكاتك
والساعات
محتاج إليك
محتاج احسك واسمعك
محتاج قوي

تملاني بيك

كلام ..مااتقالش

للحياه..إيقاع.....يحى خليل

وضهر الصفحه مين يقراه ؟؟
ومين يكتب كلام لاجئ

كلام هربان؟
ومين يقرا
ومين يسمع
ومين بيحس ؟

مهيش فارقه

يبات في القلب أو في الوش

كلام ...منفي

كلام ..خايف

كلام ...مااتقالش

حصار

بارسمك

ياوش ضايع في البلاد
بارسم الأبيض ف عينك
والسواد
باحفر على جبينك حنينك
للرجوع
والليل...دموع
تنزل على خد النهار
مليون حصار
وانت وحيد

تغرز ضوافرها المدن
وتشكلك
ماأسهلك
ما أجهلك
تهرب لفين ؟
والهربانين جوّاك

معاك
حبة غناوي صغيره
وحبة محبه مبعتراك
الحلم راح
والعمر..راح
وانت اشتهائك للرياح..هيموتك
شايف ياجاهل سكتك ؟
وحدك

وحَدّك

والطريق
حبة ورق أصفرعتيق

وصوان

عزا

يارب

مسجد محمد علي-القلعه-مصر

إلى الشاعر محمد فارس

_______

وحاسس تقل آهاتك من الأول
وبسمعها
واطاوعها
واهنن فيها لتطوّل
وتتحول
جدار... ملعون
وليك عندي أمانه وحلم ووصية

أمانه ياصاحبي ماتفارق
مدام عاشق
وخللي الحلم للآخر
يونس ليلك المهجور
ويسند ضهرك العاري
على حبة رضا

فاضلين

وقول يارب

كل الأماكن ديّقين
سدرك
خيالك

إحتمالك
والورق

كل القصايد كدابين
ضي القمر
ومسا المسافر
غربة الأشياء
فراق العاشقين
ياكدابين......
يامفرقينّي مابين

وبين
العدل فين ؟؟
مهموم قوي
خايف قوي
وانت القوي
سلمّت قلبي العاصي ليك
و الأمر لك
ياسيدالغفران

تعِبت .

ولسّه

مع الشاعر أشرف فايز

ولسه الوعد ياصاحبي

قدر مكتوب
لانا خايف

ولا مغلوب
أنا راسي براس الحلم

مرفوعه
واقول الكلمه

مسموعه
أنا حرّيف في ملعبها
وهلعبها
وارقّص في الهوا خوفي
واقول الشعر واتعكزعلى كفوفي
وهاتراهن مع الأيام
لو دق الزمان كتفي

أنا سندان
وانا في الآخر..الآخر

وانا الكسبان

في عز الليل-2

ساري دويدار

------------

في عز الليل

يدق الحلم أبوابك
ويتفرفت على عتابك
قمر ضاوي
وتقلع خوفك الحاوي
وتنحت قلبك المهزوم
هموم وغيوم
مطر ..وكتاب
ورعشة برد "ديسمبر"
بلا ..أصحاب
وحيد إنت
وصوت "فيروز"

بيتسرسب في أنفاسك
ويخلق م الغنا ناسك
ويزرع في الخلا قلبك
قمر ونسان
هنا
إنسان

وحرّيه !

في عز الليل

1-في عز الليل

وشّي...لمحمد سعيد..تاني

---------------

في عز الليل

بيسقط وشك المُتعَب

ويتمرد عليك الحلم

تبقى إنت ..ومش غيرك

تقف عاري البدن ..مفضوح

وفين ماتروح

مافيش غيرك

وحيد.. إنت

ومتحاصر

بتتخاصر.. بأوجاعك

وترقص م الألم...وحدك

مافيش غيرك

يلملم م الساعات رسمك

ويحفر وشّك المنسي

ويكتب إسمك المُهمَل

قصيدة شعرع الجدران

وصوت هربان /حنين عابر

على صراط الوجع

للصبح

رفيق العمر

وسهران البكا ويّاك
لحد الصبح

حد غناك
ويبقى في النغم نوته
ومكبوته
في زغروتة فرح سهران
رفيق العمر بيطبطب
على كتافك
ويبدر في الغنا دمعك
وبيطاوعك
وبيلاوعك
ولو خان القمر ضيّه
نجوم الليل
تخون..زيّه
رفيق العمر مايخونك
جنونك/بصّتك /صوتك
حنينك / فرقتك /موتك
ولو داس الوجع في الليل
على سكوتك
ناديني وبصّللي وسرخ
دنا حضنك
وانا حزنك
رفيق العمر

كاف...و نون

وبتقرّب

ياحرف النون لحرف الكاف

ساعات بتمدّ في الخطوه

ساعات.. بتخاف

ساعات ..شايف ساعات بتضِلّ

ولا بتيأس.. ولا بتِكلّ

ولسّه بيشتهي الفستان خيوط التلّ..؟

هتتقابل صحيح..لكن على وشوشنا

خطوط الحلم من جوّاك وجوّايا " تكرمشنا "

خطوط...وخيوط

وحبة أسئله..بتموت

وإيه تفرق؟

مادام القلب لا بيقرا ولا بيسمع

وإيه تفرق؟

مادام عينِك لا بتشوفني ولا بتدمع

ولا بتقوللّي كن..فأكون

ولسّه كتييييير على الفرحه

ولسّه الأسئله..جارحه

ولسّه عنيكي مهمومه

ولسّه ا لكلمه..مهزومه

و مش قايله

ولا إيدي كمان طايله

خيوط التل ع الفستان

يامولاتي

أنا الشاعر

أنا العصفور

أنا المندور لنور الشمس

أناالمبني على المجهول

"أنا المعرب "ضمير غائب

أنا الهارب

ماليش في الأجوبه والرد

ولا جايب عشانك..غد

أنا الحرف اللي وقت الجد

بيكونك

أنا ..كونك

......أنا بدايتك

وانا ضي القمر مفرود

على مرايتك

أنا.....غايتك

ومن غيري....مافيش بدايات

ومن غيرك.....ماليش آخِر

ولا... نهايات

مادام الكلمه هربانه

ف بحرك...شعر

ما دام قلبك هيفضل... سرّ

أنا......مش حر

ولا عاقل

ولا ..مجنون

أنا المسجون ف حرف النون

أكون....

فيَكون

ولو كلمه

ولو كلمه

هكون شاعر
واجمّع روحي في حروفها

وأهديها لخوفك....دار

انا ياسكة الحلم اللي مزروعه
ألم ..ومرار

مليش من عالم الأسرارسوى الكلمه

دنا شاعر... على قدي

وما ف يدي

سوى..أسمع

واحس

واقول
يارسمالي الغنا والقول
أنا شرحك ..وتفسيرك

وطعم الصدق في ضميرك

أنا...خيرك
وانا حزنك
وانا فرْحك

ولو جارحك.. قوي بعادي

وهتنادي

يادوب..كلمه

والاقي القلب يرجع حي

منيش عايز قمر ولا ضي

ولا عايز كمان الجي ..لو ضلمه

ولو حتكوني يوم كلمه؟

حتبقى في السما ..آيه

ماهي كفايه

وهيّا القصد والغايه

وهيّا اللي عشانها نويت

...اقولها لوحدها

وأموت

جواب تالت

بلكونتي..زمااان

إلي أشرف الشلقاني...برضه________

عارف ياأشرف
لما تنزف.. فيك جراحك
لما يعلى صوت نواحك
يبقى صوتك شئ غريب
يبقى كل غناك..نحيب
والغريب..ياصاحبي إنك مش كده
عصفور..ولكن مش سعيد
إزاي يفيد ؟
لوكان غناه بالشكل ده
طب ليه كده؟
أنا مش نبي

وأكيد كمان أنا مش غبي
محتاجه روحي تنطلق
في الكون تكون كده..مطلقه
ملّيت ..بقى
محتاج ياأشرف قلب
أخرج م القفص ..م الشرنقه
حبة هوّا ...حبة.. براح
أرتاح..واعود

لما القلوب ف بلادنا

تبقى مهيأه

جواب تاني

جداريه من أعمال حسام عتلم-ألمانيا
------------

إلى الشاعر أشرف الشلقاني

واقولّك ايه وانا حاسّك..ياشلقاني
دنا زيّك

بقلب ضعيـــف وبيعاني
حاجات ياما ..ودوامه
تخلي وشوشنا مش هيه
قلوبنا الماس..بتتخربش
وتتشوش
وتبقى حديده مرميّه
مصديّه
تشوتها الناس
أو..تنداس

بلا رحمه..بلا ديّه
ولا يبكي علينا حد
لونصرخ..يقيموا الحد
ولو نسكت

منبقاش ناس

! جيــل

فيروز حاتم عتلم...بنت اخويا

--------------

من مساجله شعريه مع محمد سعيد

_________

تاهت جهاتنا الاربعه
لمّا صبحنا.. شعب عالي الجعجعه
كتب التاريخ متفبركه و مترقّعه
علشان تخلد انجازات أهيفها صول
ضاعت أصول
تاهت.. عقول
وبقينا شعب من العجول

عايشين بطوله مزيفه
ملطوع ياختم النسرفوق أتخن قفا
مضحوك علينا في العلن
ملعون أبونا في الخفا
و"نجيب منين بس الجلد" ؟
حسره عليكي يابلد
لمّا ولادك يبقوا جيل
عابر ..سبيل
من غير دليل
حبّه..مع..وحبّه ..مع
من غير ملامح..إمّعه
وتتوووه

جهاتنا الأربعه

جواب أول

إلى الشاعر محمد سعيد -صفحات العمر

إسند جدارك ياوله
فتت حصارالأسئله
المشكله..مش في السؤال
ولا في الإجابه
المشكله..هم الغلابه
اللي احنا- برضك - منّهم
ولا عمرهم..شافوا النهار
والليل.. مرار
عايشين وبس
ولاحد شاف أو حد حس
ولا حد شايل همهم
وتقوللي برضك مهزومين؟
هوّا احنا مين؟
شعرا وفلاسفه مجعوصين
بنحب طرح الأسئله
والولوله..والدهوله
طب قوللي يامحمد سعيد
لو في الزمان ده الشعر
فعلا شئ ..مفيد
ليه إحنا مش قادرين نفوق ؟
رغم اننا حاسّين قوي

حاسّين قوي

بسنّ الخازوق

حلم

إحلمي يا ملاك ونايم
ماتخافيش
إحلمي وخليني جوّا الحلم
اعيش
لو غيابي طال

وطال البرد عمرِك
خلّي حلمك بيت

يبات الحب فيه
واحلميه
***
حلم ضايع في الشوارع
حلم راجع.. للبيوت
حلم متعبي بمواجع
حلمنا ..ولو فيها موت
إندهيني..واندهيه
واحلميه

***
لسه حلمك في انتظارك
مهما خان الليل ..نهارك
يبقى نورك

يبقى نارك
ترفضي ليه تحلميه

إحلميه
***
باب خشب وقلوب قزاز
ضحكه بتهز الحيطان
لمّة اصحابنا العزاز
والمكان ..هوّا المكان
لسه طعم الحب فيه
"طب مادام العشق صاحي"
خايفه ليه ..؟
إحلميه

فاوست..شاعراً

إلـى الشاعر الموعود : أشرف فايز

_______

وبجلد روحي لاجل أنام

تحاصرني الهموم ..واقوم

ألاقي سؤال بيجبرني أكون...صاحي

و إيه يبقالي من يومي سوى جراحي

وحبة دمع..؟

أنا صورتي بتملا الشوف

وصوتي مغنا تملا السمع

أنا اللي الدنيا عشقتني على شروطها

أكون صوتها

قبلت الشرط

وكان الخط ..غير الخط

...ومن يومها

غويت الشعر

اروح للنجم لو عالي

.....على شمالي

شيطان وسواس

وفي يميني

قزازة...حبر

اقول الكلمه زي الجمر

تطلع خمر

تسكر ناس

وتشعل فيهم الأنفاس

بقيت شاعر

بقيت مهموم

بقيت ...ع ت ل م

ولما الليل..يهنّني

بيسكنّي..ويسلب مني تفكيري

ألاقي الدنيا في سريري

ولا.. أشهى ولا أطعم

أنا المفعم...لحد الموت

وبحفر نشوتي..بالصوت

وأعمل م الغنا ..حاره

والاقي دماغي سنّاره

وفتلة خيط

وقلب عبيط

بيغزل صورته ع الهامش

صحيح..عايش...؟

ومافي كتابي غير..أبيات

وبجلد روحي لاجل تبات

والاقي مخدتي جراحي

أنام صاحي

واقرا ف سورة الرحمن

أنا الإنسان

ولو مش رحمة النسيان

لكان الهم خدني..لتحت

ولو وزني دهب ما ارتحت

مالكش في دنيتك صاحب

سوى العلاّم

أقوم اتوضا وأصلي

ولما أحط راسي

بنااااام

شـــئ يبعدك

وبتبقي جنبي ... قريّبه
لكن ...بحس بشيء غريب
شىء ...يبعدك ‍‍‍‍
عن دايرتي...عن سكتي
عن كل أحزاني وهمي ودنيتي
شىء يبعدك

أوقات

بحس ان المسافه مابين ايديّه ... ودمعتك
مشوار ...طـــويل
وان اللي كنا بنحلمه طــول عمرنا
شـــىء مستحيل
وساعات

باحسّ انك وجودي
والأماكن والزمن
ويكون لي حضنك
لما باتغرب وطن
بس العذاب ياحبيبتي اني بخسرك
واخسر معاكي كل شىء
لما باكون جنبك ..قريب
لكن بحس بشىء غريب
شىء يبعدك

عن دايرتي....عن سكتي
عن كل أحزاني وهمي ودنيتي

شـــىء

يبعدك

ونتصالح مع الأيام

مع الشاعره رشا عبدالرازق

ويا آهة القلب الوحيد
اتقسّمي
على كاف ونون

حملك..يهون
مجنووووووووون

ياسيف الإنتظار
طايح بساعات الشقى
وقت النهار
والليل حصار
بالأسئله
وحبة..وله
وحنين..مميـــــــت
مش تبقى ياقلبي

عبيـــط؟

واكون اقرب

من الحلم اللي يتردد

على جفونك

ولا يخونك

ولاينســـاكي في غيابك
أكون العمر في كتابك
أنا ... معاكي
أنا الخير اللي جواكي
برغم سنين بتهزمنا
وتحرمنا وتقسمنا
عطش- والغيم
وبين ماضي..وبين آتِي
يامولاتي
أنا المطرود من الجنه
وبستنى

وبستنى
وبستنى
يعدي موسم الغفران
يزيل الهم من جوفي
يموت خوفي
والاقي الحلم...يتفسر
وقلب اخضر
يجاوب ع السؤال المر

صحيح ان المطر..

صدفه؟؟
صحيح ان القمر…

كداب ؟؟
أنا ياحبيبتي باتفتت
حنين .. وعتاب
أكون اقرب من الحلم اللي يتردد
على جفونك ؟
أكون.... كونك ؟
تكوني الصدفه والميعاد؟
نكون إحنا

وإحنا بعاد؟
نكون...أو لا
نكون.....

أو... لا
ونتصالح

مع الأيــام

وقالت شهرزاد

وازاي حنحكي يابلد
و هنحكي إيه
مرتاح يابيه
قاعد مربع ع الفوتيه
من ربع قرن
ملطّخه كل الحيطان
صورة جنابك

زي "حيل" ملهوش علاج
بسم النبي حارسك

منوّر ..
سنّه لولي
وسنّه ..عاج
ولسّه لازق على القفا
ومفيش فراق
حالف علينا بالطلاق
ميحلّ عنّا
لو فضل جوّانا دين
ونقول يامين
ياخلق ..هووووه
شيخ البلد

خلّف ولد طالع" لابوه"
مهي أمّه تبقى مرات أسد
واحنا رعايا
أو ولايا ..مكسورين
يورثنا م اللي خلفوه
ولاّ نحكي عن أخوه؟
يا ناس حوشوه
بتقول ديوك ؟
طب كاكي ..كوك
من وقت ما العسكر
بقوا همّا الملوك
مسرور وقف عل كل باب
لو قلت لأه

يسحلوك
ولو انت شايف غير "نعم"
حيطينوا عيشة ابوك
خمسين سنه

محبوسه جوّا المعتقل
كل الديوك
منعول" ابوهم ياوطن"

منعول...أبوك

حريّه

الليله برد
وفي الشوارع كل حاجه بتنسحب

!هربانه من حزن المطر

وحدك تمر

بين العواميد والشجر

توهب حنينك للشتا

صورتك... كما احجار الرصيف

متفتتــه

بتلم بعضك من حكايات الشبابيك البعيده
وترتعش
مستني دفءالروح من بردالزمن ...؟

حزنك وطن

حزنك وطن
متخبي تحت الجلد

في الشريان

وفي كتاب الحواديت القديمه

وفي اشتهائك للغنا

إنت .... أنا

وقت اشتعالك جوا مني

لو ... نغني؟

لو تصالحنا الشوارع
والملامح ..والمدى
هتحط أيدك جوّا سدري

وتوهب الطير للفضا
دالحزن ياصاحبي..جبان
إلحزن ياصاحبي بيهرب

من شــوية

فضفضه

العصفور

ولا كنت يوم شاطر حسن

ولايوم حلمت يكونلي سيف مسحور

ولا أركب بساط الريح
واعدي جزيرة المرجان
بلاد الجان

اجيب مصباح علاء الدين

وستين من بنات الحور

يامولاتي
يامولاتي

أنا ماملكش غير إني أكون نفسي

أنا العصفور

بيفرد في الرياح...همه

ولاهمه... حدود أوسور

يدوووور.. والفجر بيشقشق

يلم العتمه ويزقزق

يفرق من غناه النور

على الشبابيك

أنا العصفور

ضعيف..؟
يمكن
لكن ممكن

يهز احلامنا..وهمومنا

يعلمنا الغنا والبوح

ويهدينا النهار..ويروح

يلقّط من حنايا الروح

بقايا الخير

.منيش فارس من الأساطير

أنا معرفش إلا أطير

وسامحيني ..ياست الحسن

أنا مقبلش اكون إلا على كيفي

أروح.. مطرح ميغويني الندى والنور

انا العصفور

في كل مكان

قليل الحيله والإمكان

أناالإنسان

أناالإنسان

بلادي العشق والمغنا

أنا الشاعر

سجين الكلمه والمعنى

وقلبي للبراح

مندور

أنا العصفور

الأسئله

(1)

صدق

ليه ياشجر

كل الأحبه بيخدعوا

وبيوجعوا القلب البرئ

دنا قلبي سجادة صلا

واللي غواه
.. حلمه العنيد

ليه يانخيل

الحلم بيمد لبعيــد

والصدق دايما

ينسحب ؟

(2)

حلم

متصحنيش يابكره جيّ

ومتجينيش

أناحلمي واخدني ف طريق الحق والخيروالسلام

متصحنيش يابكره لو هفضل
أنا

(3)

شــــك

زرعواالقلوب بالشك..واحنا

صغيرين

واتحولت نظرتنا
فيضان أسئله

ونقول ياميـــن
ويدلنا

من غير تمن

ويصب في عروقنا الأيمان وقت المحن

ويلمنا

متقولنا

ياحلمنا الموعود

ياهلترى

هنشــك
في الموجود؟

(4)

فلسفه

بالليل

وانا مصاحب كراسي القهوه والأسفلت مفرود ع المدى

....نط السؤال
الأصل في الدنيا دي ايه... ؟

البدايه للميلاد !!؟
والا كان البدئ...موت...؟

الصمت واللاالصوت..؟

الأصل إيه ؟

ما سمعت غيرصوت العجوزالقهوجي

سحــلب …..يابيه

ملك..شايـب

أحب الجمع..واللمّه
واحب القسمه

لمّا تكون مابين أصحاب

في ملمّه

واحب اطرح لأحبابي مسائلهم
واسائلهم عن الأحوال
وعن "كيد النسا"..أسمع
وعن "قهر الرجال" ..موّال
أنا...رحّال
ومرسايا الرحيل ..والحب
أحب اضرب على عودي
وأعدي بالغنا..حدودي
وجودي الفلسفه..والشعر
قليل الفرْح ...والحيله

برئ الوش
أنا الشايب ف كوتشينة زمن بيغش
ملك..؟؟

يمكن
لكن..شايب
مالوش لازمه
وكل الشعر في كتابي ولا يساوي
رباط جزمه
ولاقادر أعدّي للي جاي

راجل
ويااااراااجل
ماتركب حبه وتـ دلدل

وإيه..يجرى
مادام الضحك..هيجلجل
ويتبرجل

حساب العقل
ولو سألوني : إيه.... هتعوز؟
هه

مممم؟؟

أكون أراجوز

أكون

أراجوز

وتبقى الهمّه

منصوبه
وتبقى اللمّه

متلمّه
و"طرطوري" يكون الفصل
بين الهزل..والحكمه
صحيح..شايب
ومش جايب
من الماضي
سوى الحسره على عمرك

وطووول عمرك

ملك..خايب

صلاة

عماد حمدي

كل شئ في الدنيا متلون

بلون الاشتياق

...القمر

...والليل

وآلام الفراق

واللي بيحاصرني دايما

!! هوا إنتي

جوا أنفاسي

واحساسي ..وكلامي

وحتى أحلامي بتبقى

برضه.....انتي

فهميني ياحبيبتي

لو خلت كل الليالي من وجودك

والقمر خاصم سماه

لو خطاوي العمر ضلت عن عيونك

والحنين..جوايا تاه

يبقى إيه في الدنيا صادق..؟

يبقى إيه طعم الحياه؟؟

إفهميني ياحبيبتي

ياعذابي

واغترابي

وانسحابي

...من هموم الناس

لهّمك

محتاج اقولك..واسمعك

محتاج أضمك

...ياللي منك

بسمه واحده بتمحي آلام البشر

وبتمنحي كل الوجودالمغفره

المعذره

المعذره

لو كنت مش قادرأخاصمك

غصب عني...قلبي سامحك

نفسي أتوضا بملامحك

طهريني

طهريني

طهريني من ظنوني

و من جنوني

ومن ذنوب كل البشر

تلقي حزن القلب يركع

بين إيديكي ومن عنيكي

يتولد

تاني القمر

شاعر..وقضيه

...شاعر

ودنيا الإنضباط مش سكّتي

ولاغيّتي المشي العِوج

...شاعر

وهيّا قضيتي

حبيت حواري شَعرها

....دلّلتها

حكّمتها

وزرعتها سكّة سلامه
للي راجع

واللي ضايع

واللي بايع روحه بخس

واللي من خرم التاريخ

بيبصّ...بس

يكتب في حبك ميت قصيده وينتحب

فرسان..هجَص

وملوك..كلام

ملعون أبو الشِعر اللي خلاّنا نناااااام

ونجرجر الحرف اللي غايب واللي هايب

حاء.....وباء

جرّبنا كل الأنبياء

والأغبياء

والأشقياء
جرّبنا حتى الأدعياء

ماأجهل الشعراء وأنبل حبها

بنحبها..؟

ونبوح..لها

والصوت..عجوز

واهن قوي

إحنا الغلابه/المُبعدين/الصابرين/الخجلانين منها قوي

شعرا بصحيح

بس الغنا..طالع فحيح

وتلات حروف متفرّطين

بنلمّهم..لكنهم

ياحسره طالعين معكوسين

الـ(راء)... رياء

والـ(صاد) ...صريخ

والـ(ميم)... مصير

إلشاهدين/ السامعين/ الصامتين

هيّا القصيد واحنا عبيد

إلفلسفه والشحتفه ولطم الخدود

هيّا المدى واحنا الحدود

هتعود؟؟؟

أكيد

وتلملم الحرف العنيد

جنب الخفي

وتطهَّر الإسم العفي

من كل قهر

ونشوف حروفها شمس طالّه ف كل عصر

نقول بقى

...ونقول بقى

باسمك يامصر

مغارب

لما تبات الشمس ف حضنك

وارمي همومي ف كهف الليل

بفتح بابي لحلم العمر

يلم خيوط الضي

ويغزل فجر ..يروحلك

ويصرَّحلك

إن ليالي العمر ..مداين

وانتي.... أميره

وان خلايا القلب أسيره

وعشقك... فرض

وبتهديكي السما والأرض

لما تبات الشمس ف حضنك

وابدأ سفري ف بحر الليل

تبقي بدايه

...تبقي نهاية

كل رحيل

بــاب ...دوّار

وليه فيكي الونس

شارد

وليه حزنك صبح..مارد

وليه صوتك بقى يخوِّف

عيال احنا

وقلبك هوّا مطرحنا

بداية عمرنا كنتي

نهاية حلم ..

هتكوني

ولاتهوني

على قلوبنا

مغلِّبنا

بياض قلبك/سواد الحال

وحاكم

يكتب الموال

على جلودنا

ولوعدنا نموت م القهر

نشوفِك يامّه تحني الضهر

وتبوسي ف إيدين

فاجره

ولا شافت

ولاسِمْعِت

ولاقادره

نلم الشكوى ع الحسره

على حبة ولع مغلوب

ونرجع نقرا ف المكتوب

قلوب

بتدوب

وتتفرفت

في كل مطار

وليه دوّار يا باب الدار

وليه تنسدّ ف وشوشنا بيبان بكره

دا مافي الإيد سوى فكره

علم..ونشيد

وقلب شهيـد

بيجمعنا على بابه

ويعزم كل أحبابه

على حضره ف صلاة الفجر

ويطلع نور من الجنّه

وحنّه

ونقش ف جبينا

بيفرد فوق صلاة العصر

تحيا مصر

تحيا...

مصر

زقزقه

آدم حسام عتلم

ملامح

....

سرح الوجع في الليل بيسرق قلبنا

خلاّ السـاعات ...رحّايه دايره ع الوشوش

حاولت اجمّع من تراب الريح ..رتوش

مالقيتلي شكل

مالقيت ملامح كنت فاكر إن انا بيها اتولدت

....

إشتباك

....

ياجوّا قلبي بندهك

ياطير وهايم في الفضا

رغم المسافات اللي بينّا..والنِدا وصمت الصدى

حاولت اعـدِل سكِتك

بس انهزمت

ورجعت تاني اتبعك

....

إحتلال

....

من زمان

والقلب عايش عزلته

فتح البيبان

فرسان عنيكي إحتلته

وطلّت على كل الأماكن

فتِّشت

وطلعلها حزني العجوز

فاستسلمِت

....

وهم

....

وبدأت الف البحر ..ف سجاره

واشد ..وانفخ ..وابصبص

للجاره بجساره

لكن...أعود

من تاني والقى محنتي لتنين

قلبي.. و ..عينين

لسّاها محتاره

....

حيرة

....

إحترت...؟

عدٍّيت الحدود

وفهمت..؟

بصّيت ع الوجود
مرَّه بغنا

مرّات..بكا

....بس العذاب إن العيون

لسَّاها برضه بتحتوي

نــفس البرود

....

هزيمه

....

ودخلت جنه من الورق ومن الحروف

غنيت وقلبي كان ســعيـد

طلِّيت لجوايا ..أشـوف

...رفرف سكوتي

من جديد

....

عزله

....

وسكنت نجمه محندقه

فلسفت يومي بتريقه

وجريت

وجريت ورا انصاص الليالي

وبعترف

لسه في قلبي زقزقه

....

إحتياج

....

صاحبني نبني شكل تاني للساعات

صاحبني نهزم كل جدران السكات

ونقول..غنا من قلبنا

جايز ساعتها نبتدي

فك الرموز

وجع البعاد

سفر

سفر

سفر

وانتي المسافه والتعـب

وانتي القدر

وانتي اللي بتكوني ف سواد

قمر

يام العيون المليانين غربه وسفر

فاكر أنا آخر وداع

الغيم دموعك ياحبيبتي

وكنت انا المليان ... وجع

لحظة ضياع

بردان....وخايف

كنت شايف..جوّا منك

شئ حزين

وف عنيكي.. رغم صمتك

كنت سامع صوت أنيــن

ياهلترى .. ياحنين

مسافر ... أد إيه ؟

ولفـين عنيه راميين ..وجع ؟

ياعيون حبيبتي الطيبه

ياقريّبه....ياقرّيبه

رغم البعاد

يابلاد.....

تلمّلم في الميعاد حلم المطر

نهر القمررايح لفين؟

لوتعرفي ؟

يامُّ العيون المليانين

بسنين ..عطش

وسنين.. فراق

يام العيون الأنبياء

إلـشوق.....سفر

والمـوت.....سفر

يام العيون المحرومين/ المهزومين

بسنين .. غياب

لوتعرفي بعد السفر

بعد القـدر

بعد الحساب

هنكون وصلنا لأي باب ؟؟؟

عزيز عيني

....وخبيني

ف نن عنيكي من جوّه

أنا اللي استاهل اللّـحظا دي مش هوّا

أنا الساكت/ومش قايل

أنا المحتاج/ومش طايل

أبوح ليكي

وأحلف بيكي كل صباح

عشان العشق لعيونك

ماعدش مباح

وممنوع الغنا كلّه

وممنوع الكلام..كلّه

وممنوعه الإيدين تتمس

: عزيز عيني

ماتحلمليش

ولاتستنى يوم حلمك

يكون حلمي

أنا غيرك ومش زيك

بسيـــــط... جدا

لاواخد م القمر..لوني

ولا م الفجر لحظة عشق لو يدّن

وباتعصّب قوي..جداً

واغير واتشدّ لعيونك

وادوب / أضعف / أضيع جداً

وحابب ضحكتك..جداً

ومحتاجلك

حقيقي بجد

آآآآه ...جداً

بلاأحلام

بلابكره

ولاممنوع

.

.

.

...خلاص الوقت

ضمّيني

كمان

أكتر

قوي..

دلوقت