آدم حسام عتلمملامح
....
سرح الوجع في الليل بيسرق قلبنا
خلاّ السـاعات ...رحّايه دايره ع الوشوش
حاولت اجمّع من تراب الريح ..رتوش
مالقيتلي شكل
مالقيت ملامح كنت فاكر إن انا بيها اتولدت
....
إشتباك
....
ياجوّا قلبي بندهك
ياطير وهايم في الفضا
رغم المسافات اللي بينّا..والنِدا وصمت الصدى
حاولت اعـدِل سكِتك
بس انهزمت
ورجعت تاني اتبعك
....
إحتلال
....
من زمان
والقلب عايش عزلته
فتح البيبان
فرسان عنيكي إحتلته
وطلّت على كل الأماكن
فتِّشت
وطلعلها حزني العجوز
فاستسلمِت
....
وهم
....
وبدأت الف البحر ..ف سجاره
واشد ..وانفخ ..وابصبص
للجاره بجساره
لكن...أعود
من تاني والقى محنتي لتنين
قلبي.. و ..عينين
لسّاها محتاره
....
حيرة
....
إحترت...؟
عدٍّيت الحدود
وفهمت..؟
بصّيت ع الوجود
مرَّه بغنا
مرَّه بغنا
مرّات..بكا
....بس العذاب إن العيون
لسَّاها برضه بتحتوي
نــفس البرود
....
هزيمه
....
ودخلت جنه من الورق ومن الحروف
غنيت وقلبي كان ســعيـد
طلِّيت لجوايا ..أشـوف
...رفرف سكوتي
من جديد
....
عزله
....
وسكنت نجمه محندقه
فلسفت يومي بتريقه
وجريت
وجريت ورا انصاص الليالي
وبعترف
لسه في قلبي زقزقه
....
إحتياج
....
صاحبني نبني شكل تاني للساعات
صاحبني نهزم كل جدران السكات
ونقول..غنا من قلبنا
جايز ساعتها نبتدي
فك الرموز
هناك 3 تعليقات:
إحتياج
....
صاحبني نبني شكل تاني للساعات
صاحبني نهزم كل جدران السكات
ونقول..غنا من قلبنا
جايز ساعتها نبتدي
فك الرموز
ــــــ
ومن هنا بدأت اول خطوتي
يمكن الاقي سكتي
تجاور ف يوم سكتك
يمكن ساعتها نبتدي
نحل كل الاسئلة
الممكنة
وغير الممكنة
فينك يا عمنا بارب تكون بخبر
elrayaa
محاولة محمودة ولكن نود التفصيل أكثر عن المعييار التي استخدمت في هذا الاختيار
إرسال تعليق