ست البنات

كانت

تعدي في الشوارع والحارات

تزرع....فَرَح

وتسيب وراها -لما تمشي-في القلوب
لهفه وأهات

كانت "شهيّه"

عيونها كانوا..شبّاكين

طالّين... عليّا

والصبيّه ف كل رايحه وكل جايه

تقول أنا : ست البنات

بتقوم ..يقوم الفجر

تضحك

يتولد من ضحكها نورالنهار

ينشر..عمار

كانت تبات

ويبات ف قلبي حلمها

وف قلبها
ياااااقلبها

سكّر..نبات

كانت صغيره والضفيره

تملا كل الكون صهيل

كانت : هديل

بتميل

تميّل بختِنا

وتهزّ نخلة حلمنا

يسقط.....غمام

وتنام..

تصحّي في العروق
أسراب.. حمام
كان حلمها فارس أصيل

أسمر ..جميل

مصري..جدع

لما توشوش في الودع

تلقاه دليل

كانت هديل
والنيل صحاب

طلّ الغياب

عرّاف بيقرا فوق خريطة جسمها

مليون..عتاب

راحوا الصحاب
واتفرّقوا........

وفْضِلْت وحدي بانتظر

خمسين سنه

ولا عادش للشارع

هديل

ولاعاد

نخيل

ولاعادش فاضل في الحكايه

غير خلا

قلبي اللي عمره مااتملا

قلبي الجريح

وف كل ليله بينفرط

عصفور

وريح