جواب أول

إلى الشاعر محمد سعيد -صفحات العمر

إسند جدارك ياوله
فتت حصارالأسئله
المشكله..مش في السؤال
ولا في الإجابه
المشكله..هم الغلابه
اللي احنا- برضك - منّهم
ولا عمرهم..شافوا النهار
والليل.. مرار
عايشين وبس
ولاحد شاف أو حد حس
ولا حد شايل همهم
وتقوللي برضك مهزومين؟
هوّا احنا مين؟
شعرا وفلاسفه مجعوصين
بنحب طرح الأسئله
والولوله..والدهوله
طب قوللي يامحمد سعيد
لو في الزمان ده الشعر
فعلا شئ ..مفيد
ليه إحنا مش قادرين نفوق ؟
رغم اننا حاسّين قوي

حاسّين قوي

بسنّ الخازوق