توبه...!

حضنك حبيبتي الليله
مش عادي...!!
قلبك شوارع دابّه فيها الروح
قلبي ...
مواسم عشق طرحالك
مداين بوح
هقولّك ...
ع اللي جوا القلب متداري
وعن ناري
وعن تغريبتي ف عيونك
ومشواري
وعن رفضك
وإصراري :
هويتك...
وانت زي البحر.. غداره
وزي الدنيا دوّاره
وزي النفس أمّاره
وزي التوبه م العصيان !
لقيتك...
وانت على شطي
بتنفرطي....
قصايد شعر
وقلتك م الكلام... غايته
سايست حصانك الجامح ولجمته
وكنت الرابح الخسران .
يامعناة الكلام...فينك
يابطن الشاعر "المكلوم"
ومش حاسّين ....وسايبينك
حبيبتي الليله.... باستسلم !!
هاسيب "كلكعتي" على بابك
وهافرش كل أحزاني على عتابك
واخطي لك بقلب "سليم"
وهاحلف لك على الغايب رجوع ...
يرجع...
ويحفر فوق بيبانك شعر
ياحضنك ياللي مايساعنيش
أكيد الليله هاتساعني
وتسمعني
وتجمعني
أنا الغايب
أنا البردان

أنا....المفروط .

جدار

مش أكيد..
تصدق ليالي الصبر ويعود القمر
مشروخ نداكي- زي صورتك-
وانتي وحدك

ويّا دمعات العيون الخضر/ساعات السفر
مهزومه حب ولخبطه
بتداري حزنك وانكسارك ف الحروف والشخبطه
"منديل خشب"
وإيدين حبيب/غايب/قريب
من فين لفين ؟
ولحد إمتى ؟

ومين يكمَل

وشك المقسوم ومتعبي ضجر
حملك تقيل !!
والشعر مابيشفيش غليل
كداب ياليل الإنتظار
لا عدت سامع صوتك المليان ...أنا
ولاعدت انا
قادر أعدي بخطوتي
عندك
بعيد....
خلف الجدار.

من دفتر الظروف

ظرف زمان

---------------

وانت داخل لاربعين

عارف بإن الجي ..يمكن
ربما !!....
والأكيد
هوا اللي راح...
ولاعادش حاجه هتوجعك
ولا تغلبك...حتى الجراح
مافضلش منك حاجه تنفع أي حد
مافاضلش غير إنك تعد الأرصفه
وكفوف تسلّم أو تشاور من بعيد
ووشوش لناس زيك تمام
واقفين..تمام
باصّين ...وبس !

ظرف سعيد

--------------

وعملتلي حبة صحاب
خبيت عليهم وش مش لايق لهم
حوِّشتهم
في مكان بعيد
والظرف كان- رغم الألم-
بيهُم...
سعيد

ظرف صعب

----------------

معلش ياشادي
ماتزعلش
نمشيها " بليستيشن "
وقبل النوم هنحكي كتير
عن العصفور
وعن حلمه
وعن يومه
وعن طيرانه

وهمومه
وهتشوفني وانا ف حضنك
ضعيف ....خالص
حزين خالص
سامحني بجد
مش قادر

أبوك
مكسور .