السبت، نوفمبر 15، 2008

توبه...!

حضنك حبيبتي الليله
مش عادي...!!
قلبك شوارع دابّه فيها الروح
قلبي ...
مواسم عشق طرحالك
مداين بوح
هقولّك ...
ع اللي جوا القلب متداري
وعن ناري
وعن تغريبتي ف عيونك
ومشواري
وعن رفضك
وإصراري :
هويتك...
وانت زي البحر.. غداره
وزي الدنيا دوّاره
وزي النفس أمّاره
وزي التوبه م العصيان !
لقيتك...
وانت على شطي
بتنفرطي....
قصايد شعر
وقلتك م الكلام... غايته
سايست حصانك الجامح ولجمته
وكنت الرابح الخسران .
يامعناة الكلام...فينك
يابطن الشاعر "المكلوم"
ومش حاسّين ....وسايبينك
حبيبتي الليله.... باستسلم !!
هاسيب "كلكعتي" على بابك
وهافرش كل أحزاني على عتابك
واخطي لك بقلب "سليم"
وهاحلف لك على الغايب رجوع ...
يرجع...
ويحفر فوق بيبانك شعر
ياحضنك ياللي مايساعنيش
أكيد الليله هاتساعني
وتسمعني
وتجمعني
أنا الغايب
أنا البردان
أنا....المفروط .

هناك 25 تعليقًا:

علاء عارفين يقول...

انا كل م ا اقرا لحضرتك حاجه و اقول ان مفيش حاجه تتكتب احسن من كده

حضرتك تفاجئني وتكتب حاجه احسن

الى تقدم مستمر ان شاء الله

تحياتي
علاء عارفين

محمد عتلم يقول...

انتا راجل بجد جامد موت ....ومحترم

sara rabie يقول...

ياااااااااااااااه

اخرين عرفت اكتب كومنت فى البلوج ده:)

يا نهااااارى

..دى صحيات من السعاده بالفرصه الفظيعه دى

اما عن الصيحات الداخليه..فا اقدر اقول انى فاشله فى التعبير
لكن كلامك محسوس جدا و واصل

جميله دى..ومش محتاجه اقول دووووووس

فا ..دوووووووس :)



اه صحيح..الصورة كمان حلوة







صباحك جنة

د. إيمان مكاوي يقول...

الله ...بجد حلوه قوي
تحياتي لكلماتك

طـائر الليــل الحـزين يقول...

الله عليك ..........
اسمحلى اشكرك على الدعوة الجميلة دى
عشان بسببها قريت كلام بالروعة دى
قد ايه التشبيهات والجمل اللى فى البوست جميلة قوى
جمله كلها احلى من بعضها
بهنيييييييييك على كل الفن ده
واكييييييييد انا بقيت من اصدقاء مدوناتك
تحياااااااااتى

Empress appy يقول...

اصرار حلو اوى منك رغم التمرد بس كويس انك بتقدر تعرف خبايا المراه اللى ساعات محدش بيعرفها بس الاهم انك تقدر عليها

هاني رمضان يقول...

مساء الخير يا عم عتلم
معايا ( رقم حساب بنكي يتم تلقي التبرعات من خلاله لصالح غزة (تم عرضه في برنامج القاهرة اليوم )
(25015) بنك بيريوس.
ولو إني عارف إنك ممكن تشوف التعليق ده بعد ما غزة تنقرض أساساً ..
بس لك قراءك يا شاعر
وأنا منهم
ودي نعمة ..( أنا طبعاً !!)
واحشني يا أبو شادي والنعمة ..

هاني رمضان يقول...

بصراحة مجاليش قلب أعدّي ع النص ده ومعلقش عليه ..
رغم ان مفيش كلام يعني !!
أستخدامك لأدواتك مبهر كالعادة يا عمنا ..
و..
ايه كمان النهاية دي
وايه تغيير المخاطب اللي ادّي فلاش باك
ورجع م الغايب للحاضر ..
اللهم احفظنا !!!

غير معرف يقول...

وحشتني اووووووووووووووي

إيمان قنديل يقول...

القصيده حقا أكثر من رائعة ، جعلتني أعيشها وكأنني بطلتها، لكنك صدمتني وجعلتني أفوق من نشوتي بكلمة


المفروط .


موش عارفه مجرد رأي

ميجووو يقول...

ادينى اكتررررررررررررررررر

ريحانة يقول...

أثنا مرورنا بالطرق المكفرة ..ربما وجدنا زهرة بروعة الأمنية..تحمل لنا الكثير من الفرح
وتكفينا فرحة العثور



مرور اول واعجاب صاعد

تقبل زيارتى :)

sara rabie يقول...

انت فين يا عم

غير معرف يقول...

اخبار التوبة ايه يا رخم

غير معرف يقول...

كل سنة وانت طيب يا راجل يا طيب
اتصل انت طالما مش عارفة اوصلك يا رخم

غير معرف يقول...

و اديك رجعت و سمعت الخبر و مش صدقت
كان المفروض انك راجع ل ..........
انا مش نسياك و بتمنى انك انت كمان تكون فاكرنى
وحشتنى قوى و لسة بحبك قوى قوى قوى قوى

غير معرف يقول...

هههههههههه
ايه يا عم كل الحبيبة دي
طيب عبرهم شكلك بقي وحش اووي

yoyo يقول...

صباحك سكر

دى اول زيارة لمدونتك وان شاء الله مش هتكون الاخيرة
فى الاول احب اسجل لك اعجابى بمدونتك وكتابتك جدا بتكتب باحساس عالى اوى مشاء الله

البوست جميل اوى اعتقد ان ردها لازم يكون كدا :

يعنى خلاص يا حبيبى راجع وبتقول توبة
توبة حبيبى تبعد عن قلبى وعينى
الليلة حبيبى هتكون مش اى ليلة
الليلة هيكون حضنى هو أرضك
عيونى هتكون فرشك
تعال لدفء قلبى
تعال امسح من عمرك اى جراح
تعال ارسم على شط عيونك احلى واجمل احلام

تقبلى مرورى و تقديرى
تحياتى
يويو

غروب يقول...

لا بجد

حلوه جداااااا واكيد اول م ارجع من الامتحان اكمل باقي البوستس

ادعيلي انا رايحه الامتحان دلوقتى

shoshta_ joker يقول...

السلام عليكم....
اول مرة واكييييييييييد ان شاء الله حتتكر....بجد البلوج جاااااااامد اوى انا بحب اسلوب الشاعر دا جدا وعائلة عتلم عاملة شغال جامد موووت ....دومت بخير فى رعاية الله.
shemo

غير معرف يقول...

هنضم للمعجبين واقولك ده كلام جامد قوى وحساه قوى ونفسى تكتب كمان والدنيا متخدكش بهمومها ومشكلها من قرائك -وانت احلى حاجة فى حياتى كلامك وصورتك بيصبرونى على كتييييييير

غير معرف يقول...

وحشني

غير معرف يقول...

وحشني

غير معرف يقول...

وحشتني ...............


فينك من زمان بقالك كتير قوي مش بتكتب حاجه في المدونه بتاعتك


حاول متنساش ان ليك قراء

عموما هستنى الجديد منك قريب


بوسات كتير ليك ولشادي وزينه وسلمى




Tota Atlam
 

mariam zakaria يقول...

i like it...el kalemat 7elwa gdan w motkana it's perfect:)